ARTICALS

رمضان الذي أحب

رمضان كريم و كل سنه و انتوا طيبين..

أكيد قلتها لكم من بدري في تطبيقات مختلفة ..

بس كل شيء هنا له طعم خاص

..

عندي مواضيع كثيرة جدًا للمدونة.. لكني اليوم اخترت إني أكتب عن شهر رمضان

timthumb.php

شهر رمضان اللي أعرفه أنا و أحبه و استمتع بكل تفاصيله بلا استثناء

رمضان اللي مافيه مبالغة ولا تقصير

..

بالنسبه لي شهر رمضان هو شهر Detox

شهر التخلص من كل السموم

سموم الجسم و سموم الروح والأخلاق و العادات

شهر الطهارة و التطهر بكل ما للكلمة من معنى

.

ما يحتاج المسلم في هذا الشهر إنه يبحث عن جدول يضعه غيره عشان يمشي عليه

ولا يحتاج يمشي على عدد معين من الصفحات في القرآن زي ما يسوي فلان أو زي ما قال له علان

.

أحب في رمضان إنه شهر اكتشاف النفس

أجلس مع نفسك واكتشفها و شوف إنت مقبل على إيش في حياتك ؟ وإيش تسوي حاليًا ؟ إيش منغصاتك في هذه الدنيا؟ هل قدرت تتجاوزها؟

هل إنت سعيد؟ هل راضي بعلاقاتك مع الناس حولك؟ هل تحب ما أنت عليه ماديًا ومعنويًا و اجتماعيًا؟

.

بعدين اسأل نفسك؟

كيف علاقتك مع الله؟ -تذكر هذي اسئلة خاصة جدًا منك و لك فقط- هل أنت قريب من الله؟

إيش العبادة الخفية اللي تتقرب بها إلى الله في شدائدك؟

تقوم لله تصلي؟ تتصدق؟ تكثر استغفار و حوقله؟ تصنع معروف لأحد؟ أو تسوي شي ثاني؟

.

بعدها شوف روتينك اليومي في غير رمضان..

و حاول تتخلص من كل الأشياء اللي تتسبب لك بالذنوب

لأن الهدف في رمضان زيادة الحسنات و التقرب من الله أكثر.. مانبغى ذنوب تعيق طريقنا

لمن نشيل بعض العادات اللي كنا نسويها في غير رمضان بيصير عندنا وقت فراغ كبير

هنا لازم نبدأ نمليه بأشياء ثانيه نشغل فيها وقتنا في رمضان

.

  • استغلال الوقت:

ما أعرف ليش الناس تقول رمضان ما فيه بركه! و الوقت ما نحس فيه و ما يمدينا ننجز شي!

بالعكس من وجهة نظري رمضان كله بركه.. كل شي فيه مبارك

إحنا في رمضان ننام أقل من الأيام العادية.. تقريبًا متوسط ساعات النوم ٦ ساعات..

يعني عندنا ساعات أكثر نقدر نستغلها..

.

بتكلم لكم عن الأشياء اللي أسويها في رمضان غير الصلاة و قراءة القرآن:

١- تكلمت قبل عن مبدأ الإعتدال minimalism ..

شهر رمضان يكون فيه التنظيف السنوي لكل شيء .. كل كم يوم أمسك قسم و أرتبه و أشيل الزايد أتخلص منه

دولاب الملابس يوم و أكثر..التسريحة و الصناديق و المكتب و المكتبة و كل شيء عندي أرتبه ..

هذي المهمة مره تاخذ وقت طويل ..

بالنسبه للبنات ممكن كمان تساعدون أخوانكم إذا حسيتوا غرفتهم تحتاج ترتيب ، لأنهم غالبًا بيفشلون لحالهم..

٢- أشوف الكتب اللي لها فترة في القائمة تنتظر و أبدأ اقرأ واحد أو اثنين منها وأحاول أختار الكتب اللي لها علاقه بالتاريخ أوزمن النبي محمد صلى الله عليه وسلم أو الفتوحات.. شي يعزز لقيمة الشهر و روحانيته.. ما أحب اقرأ روايات مثلًا  أو نصوص شعرية

هذي بعض الكتب اللي ممكن تعجبكم:

مذكرات صائم لأحمد بهجت

مع النبي صلى الله عليه وسلم (قس بن ساعده)

رجال حول النبي صلى الله عليه وسلم

لا تسقني وحدي سعد مكاوي

وحوي ياوحوي -رمضان صور و حكايات- ياسر قطامش..

٣- أجلس مع أهلي -ماما و بابا خصوصًا- طول ماهم فاضيين وجالسين.. أساعدهم وألبي لهم كل شي يحتاجونه لو إن شاء الله كاسة مويه أو منديل من الطاولة.. قربهم بركه

٤- أخطط للإجازة..

٥- أقرأ أكثر عن الموضوعات اللي بدوّن عنها قريب عشان ترتقي التدوينه لعلمكم واطلاعكم

.

دائمًا يحتاج الإنسان إلى ١٤ يوم لترك عادة و ١٤ يوم أخرى لبناء عادة جديدة.. لذلك شهر رمضان فرصة للتخلص من العادات اللي مضايقتنا مهما كانت صغيرة أو كبيرة ..

.

و لازم نتذكر إنه مافيه شيء يجي بسهوله و بدون تعب.. خصوصآ فيما يتعلق بترك العادات السيئة.. الموضوع يحتاج صبر/جهاد/قوة تحمل/ عزيمة/ وقبل كل هذا الإستعانة بالله ..

.

العناية بالجسم:

أكل رمضان للأسف أغلبه مو صحي و يكون إما مقلي أو مليان سكر!

حاولوا هذا الشهر تقطعون أو تخففون من المقالي و السكريات..

يعني لا تحرمون نفسكم بس من كل شيء خذوا القليل جدًا

كثروا سلطة عشان تملي معدتكم..

اشربوا مويه قد ماتقدرون عشان تعوضون جسمكم و تساعدونه يتنظف..

بالنسبه للبنات: مو لازم تنتظرين العشر الأواخر أو ليلة العيد عشان تهتمون بجسمكم و شعركم وتنظيفاتكم ..

خلوا شهر رمضان بداية لعادات جديدة من العناية بالجسم و الوجه و الشعر ..

كلوا أكل صحي .. جربوا ماسكات جديدة.. سووا مقشرات للجسم و الوجه.. ابعدوا عن المستحضرات الكيميائية ومعالجات الشعر و اعطوا شعركم فرصه يتحسن و يتنفس ..

و بعد رمضان.. استمروا لو سمحتوا، الناس بتشوفكم طول السنه مو بس فالعيد

و الجمال و النضارة هي تراكمات عناية مستمرة مو عناية يوم أو اسبوع!.

المشي على السير تكفير ذنب لكل تخبيص الفطور.. امشوا لو نص ساعه و اسمعوا بودكاستات مفيده و ممتعة

..

Side note:

  • استشعروا جمال رمضان و أي شخص يقلل من عباداتكم أو يقول لكم لا مو كذا لازم كذا .. أو صليت قليل أو قرأت قليل، ابعدوا عنه

إذا شايفين إنكم تحاولون جاهدين و إن القليل اللي تقدمونه طالع من قلبكم، اسألوا الله الثبات و الدوام..

فخير العبادات أدومها و إن قلّ..

  • زاحموا معاصيكم بالذكر و الصدقة والقرآن

  • لا يكون همكم الأكل و إيش نطبخ بكره و إيش آكل قبل الفجر وقد إيش أشرب.. (بحسب ابن آدم لقيمات يقمن صلبه)مو يخلونه سمين و زايد وزنه

  • تدبروا آيات القرآن .. صحيح مو كل آيه نقدر نتدبرها أو حتى نفهم معناها.. بس البحث في كتب و مواقع التفسير ممتع جدًا .. البحث عن المعلومة عمومًا يخليها تثبت في بالك أكثر من لمن تقرأها في مكان ما!

593239b02100001500aa2229

  • عَنْ أَبِي هُرَيْرَةَ  ، أَنَّ النَّبِيَّ صَلَّى اللَّهُ عَلَيْهِ وَسَلَّمَ , قَالَ : ” رُبَّ صَائِمٍ لَيْسَ لَهُ حَظٌّ مِنْ صَوْمِهِ إِلَّا الْجُوعُ وَالْعَطَشُ ، وَرُبَّ قَائِمٍ لَيْسَ لَهُ حَظٌّ مِنْ قِيَامِهِ إِلَّا السَّهَرُ وَالنَّصَبُ ” 

لذلك لا تضيعون صيامكم بالغيبه و النميمة أو حتى بالسخريه من أحد!.. صوموا عن هذي الأمور و اقطعوا عادة التكلم عن الآخرين من وراهم وتوقفوا عن الاستهزاء بخلقة الله ولون الشخص نسبه و أصله!

.

تخونني الكلمات في التعبير عن جمال رمضان و روحانيته و كيف يغير الإنسان للأفضل بكل شيء فيه إن فهمنا الغاية منه ..

 

حكوني و غششوني إيش عندكم عادات حلوه في رمضان ؟؟ 

تقبل الله منا و منكم صالح الأعمال و أعاننا في هذا الشهر على الصيام و القيام..

و نشوفكم في تدوينه أخرى بإذن الله..

Advertisements
ARTICALS, Self Improvement

10 ways to enjoy laziness Ι ١٠ نقاط لنستمتع بالكسل ثم نتخلص منه

Adios!

هذي التدوينة بالضبط على محتواها.. لها تقريبًا ١٠ أيام مكتوبة و كل يوم أقول بكرة بكتبها .. اليوم بكتبها.. في الطريق للدوام بخلصها

بعدين قررت أخليها تدوينة صوتيه و سجلت نصها و انشغلت

لكن اليوم لمن رجعت قريتها عرفت إيش الحل معاها وكيف أكتبها و أنشرها بدون كسل ولا تسويف!

img

.

قبل فترة جاتني حالة كسل من زمان مره ما عشتها..

بس أبغى أنسدح و آكل و أتفرج نت فلكس

بس طول هذي الفترة كان عندي تأنيب ضمير عالي .. و أقول أكيد بدال هذا الوقت اللي ضاع كان يمديني أنجز أشياء مفيدة لي أو لغيري..

و بعد اسبوع كامل من الكسل الشديييييد قررت أتكلم عن هذا الموضوع و أحط لكم حلول تساعدنا في هذي الفترة:

  • هل خطأ إننا نحس بالكسل؟
  • كيف نتخلص منه؟
  • كيف نستمتع فيه؟

 

الكسل طبيعي جدًا لنا كبشر .. بالنهاية إحنا مو مكاين ولا روبوت يمشي على روتين واحد كل يوم و كل اسبوع بدون تغيير

إلا ما يجينا وقت و نحس إنه طاقتنا مخلصة و تحتاج refill

بالعكس فيه ناس تخصص يوم كامل تسميه lazy day و تخطط له من بدري و تستمتع بكل ثانيه فيه

 

عشان كذا:

١- مره عادي تحس بالكسل وتحس إنه مالك مزاج تسوي أي شي ..

لو جاك هذا الإحساس ، انبسط فيه و حلله لآخر قطرة

لكن حاول إنك ما تخليه يطول ..أعطي نفسك إجازه روحيه و جسديه و نفسيه و عقلية لمدة كم يوم

٢- الحافز لإنجاز الأشياء يجي و يروح

لازم تلتزم بإنجاز المهمات حتى لو اختفت المحفزات

٣- Remember your why?

دائمًا تذكروا هدفكم من كل شي تسوونه في حياتكم..

ليش أدرس؟ ليش أشتغل؟ ليش عندي مدونة؟ ليش كل يوم أصحى الصباح؟

كل يوم خصصوا أول خمسة دقايق من يومكم تتذكرون فيها أهدافكم.. اليومية و الشهرية و حتى أهدافكم فالحياة عمومًا

٤- لا تنتظر التحفيز من أحد

أهلك مديرك زملائك في العمل أصحابك

محد منهم ملزم إنه يتابعك و يشوف متى تجيك حالة الكسل و الخمول عشان يحمسك!

lazy

٥- اكتبوا قائمة بالمهام

لمن يكون قدامكم قائمة بالأشياء اللي لازم تنجزونها اليوم.. بتكون نسبة إنجازكم لها أكبر من لو خليتوها فبالكم

لأنه غالبًا الكسل هو أول دافع للتسويف .. فكل ما تفكر إنه باقي لك كذا و كذا تقول خلاص بكره أسويها

لدرجة ممكن يكون شي لازم يكون جاهز لدوامك بكره.. تقول خلاص أصحى بدري و أسويه!

لذلك دائمًا اكتبوا قائمة بالمهام و خلوها في مكان واضح.. get it out of your mind and write it

الأمر الثاني بالنسبة للقائمة: حاولوا دائمًا تبسطون المهمات و تصغرونها قد ما تقدرون

بدل ما تكتبين: أنظف غرفتي..

اكتبي:

  • أغير شرشف السرير
  • أكنس الغرفة
  • أمسح التسريحة
  • أرتب المكياج

تقسيم المهمات يخليها في عقلنا سهلة و ممكن ننجز بعضها .. و أول ما نبدأ بنلقى مع الوقت إننا خلصناها كلها

أصلًا لمن ننجز كل مهمة و نحط صح جنبها نحس بطاقة عجيبة حتى لو كانت مهمة صغيرة

و هذي طريقة معروفة بـ

How to eat an elephant

و طبعًا الجواب يكون بتقسيم المهمات أو الفيل لقطع صغيرة

و لمن تكتبون قائمة المهام دائمًا افصلوا بين المهام المهمة و الغير مهمة

واجب تسليمه بكره ينحط في أول اللست

ترتيب المكياج ينحط في آخرها لأنه لو ما صار اليوم مو آخر الدنيا

آخر شي بالنسبة لقائمة المهام و التخطيط تذكروا :

If you fail to plan, you plan to fail

٦- جربوا تقنية بومودورو

هذي تقنية طورها الإيطالي فرانسيسكو تشيريللو

و طريقتها إنك تحط لنفسك تايمر لمهمة ما .. مثلًا عندك واجب من ٢٠٠ كلمة

أول شي حط لنفسك ٨ دقايق تبحث عن الموضوع و تجمع أفكار و أول ما يرن المنبه أو يخلص التايمر لازم توقف و تاخذ بريك ٤ دقايق مثلًا و بعدها ترجع تكمل

المره اللي بعدها تطول وقت العمل و تقلل وقت البريك و هكذا

مع الوقت مخك بيتعود على إنه فيه راحه وبريك بعد فترة بسيطة من العمل فبيتحمس يبدع و يكمل معاك..

كثير ناس ناسبتهم هذي الطريقة لكن أنا لمن جربتها لقيت إني أول ما أدخل جو في العمل ما أهتم للمنبه.. أقفله و أكمل لأني أخاف ينقطع حبل أفكاري وصعب أرجعه بعدين

بس جربوها يمكن تناسب الجزء المسوف/الكسلان عندكم

bb6969d15753bfaeebdfa35169b07c89

٧- ابعدوا عن التواصل

سواء في مواقع التواصل أو التواصل الشخصي مع الناس

هذي فترة الخمول و الكسل ظاهرها يمكن مزعج لكنها في الحقيقة فيها شحن طاقة و تجديد نفسيه.. إنت تحتاج كل فترة تجلس لحالك

مو لازم تكون تتفرج أو تقرا.. أحياناً بس تبغى تنسدح و تتنح في السقف بدون أي هدف

و هذي الطريقة أبدًا ماهي تضييع وقت .. تفيدني جدًا و أحيانًا لمن يوصل عقلي و جسمي لحالة هدوء واسترخاء كامل تبدأ الأفكار الحلوة تجيني ..

1473955746235

٨- You are not superwomen/supermen

مو كل شي تقدرون تنجزونه في نفس الوقت و نفس اليوم ..

عادي تطلبون مساعدة من الناس اللي حولكم..

لمن تتوزع المهمات و تخفف على نفسك .. بتقل حالات الخمول و الكسل اللي تجيك

٩- Apply the 3 seconds rule:

بمعنى إذا قررت تسوي شي ، خلال ثلاث ثواني قوم و ابدأ فيه..

لأنه لمن تجلس تفكر فيه بزيادة بيبدأ يدخلك الكسل و التسويف

لكن لو خلال ثلاث ثواني قمت و بدأت .. مستحيل توقف في النص و تقول خلاص ما بكمل

إلا في حالة زارتك أم العبيد هههههههههههههههههههه

١٠- الدعاء .. الدعاء.. الدعاء

هذا كان لازم يكون في أول القائمة لأنه ممكن يغنيك عن كل التسعة نقاط اللي كتبتها

دائمًا رددوا أذكار الصباح و المساء من قلب

“كان رسول الله صلى الله عليه وسلم إذا أمسى قال: أمسينا وأمسى الملك لله، والحمد لله، لا إله إلا الله، وحده لا شريك له، اللهم إني أسألك من خير هذه الليلة وخير ما فيها، وأعوذ بك من شرها وشر ما فيها، اللهم إني أعوذ بك من الكسل والهرم وسوء الكبر وفتنة الدنيا وعذاب القبر”

و فيه أدعية كثيرة ثانيه:

فعن أنس بن مالك ـ رضي الله عنه: أنه كان يسمع النبي صل الله عليه وسلم كثيرا، يقول: اللهم إني أعوذ بك من الهم والحزن، والعجز والكسل، والبخل والجبن وضَلَعِ الدين وغلبة الرجال. رواه البخاري ومسلم.

وعن ابن عابس الجهني أن رسول الله صلى الله عليه وسلم قال له: يا ابن عابس، ألا أخبرك بأفضل ما يتعوذ به المتعوذون؟ قال: بلى يا رسول الله، قال: قل أعوذ برب الفلق ـ وقل أعوذ برب الناس ـ هاتين السورتين. رواه النسائي وأحمد، وصححه الألباني.

المعوذات نقرأها بنية الإستعاذة من أي شيء نخافه و نحذر منه و منها الكسل و الخمول

..

فتٌّكوا بعافيه

Self Improvement

30 things I learned in my 30..٣٠ درس تعلمته قبل سن الثلاثين

images-7.jpeg

ثواني و أودع العشرينات و أدخل عالم الثلاثينات من أوسع أبوابه..

and I got to say I have mixed emotions about that

إحساس حلو إني كبرت و وصلت لهذا العمر بس فنفس الوقت عندي أسئلة لنفسي كثير خايفه أقراها ..ببساطة لأني خايفة مايكون عندي جواب أو يكون جوابي مو حلو

giphy

و كمان شي ثاني: يمكن عشان طبع الإناث دائمًا القلق على جمالهم ومظهرهم، فزيادة العمر ترعبنا و تخلينا نفكر إنه أووه خلاص كبرنا بتطلع التجاعيد أو بتبدأ أوجاع الركبة ونصلي على كرسي <بالغت هههههههههه

لكن لمن أشوف blake lively وأعرف إنها أكبر مني أتطمن على نفسي 

و لمن أشوف ميريل ستريب و صحتها برضه أتطمن 

و يزيد إيماني إن الشباب و الجمال و الصحه مالهم علاقة بالعمر، طول ما الإنسان روحه حلوه و يهتم بنفسه بيصعب على الناس إنهم يخمنون عمره

أوكي بما إني واسيت نفسي كفايه .. خلينا نبدأ في الثلاثين درس أو نصيحة أو اكتشاف اللي تعملتهم في الثلاثين سنه من عمري..

.

5cfe452a8277ee1f2cdcc7688028b61b

١-مو كل الناس بتحبك

لا تخلي الموضوع هاجس أو هدف بالنسبه لك.. الأرواح جنود مجندة ماتنافر منها اختلف 

و فيه ناس ما يعجبها العجب.. كل مره بتطلع لك عيب و انتقاد 

هذا مو عيب فيك ، فبطل تستنى رضا كل الناس على حياتك و تصرفاتك و قرارتك

٢- الفشل هو بداية النجاح

في كل حياتك بتمر بمراحل.. كل مرحلة فيها هبوط و ارتفاع

أحيانًا تحس إنك بعييييد جدًا وما بتوصل و فيه كثير غيرك قربوا من النهاية

تحاول و تغلط وتحاول و تفشل بس بعدها بتنطلق صح و بتوصل بإذن الله

كل موقف في حياتي فشلت فيه وما استسلمت بعد توفيق الله كملته بنجاح إذا مو بتميز 

٣- لكل مرحلة ناسها .. بس في ناس للعمر كله

آمنت إنه كل مرحلة من حياتنا لها ناسها و معارفها 

مو مصلحة ولا نفاق بس الظروف كلها تسخركم لبعض في ذاك الوقت

مو شرط تجمعكم وظيفة أو دراسة.. بس وقت ماتنتهي المرحلة بيروحون و يجون ناس غيرهم

مو شرط إننا نقطعهم أو ننتهي بزعل.. بس بشكل غريب كل شي يخف تدريجيًا لين يصير ما كأنه يوم كان موجود

بس فيه ناس على الحلوة و المرة.. ناس يخافون عليك أكثر منك 

هذولا الله يكثرهم في حياتنا و يخليهم لنا 

٤- دع ما يريبك إلى مالا يريبك

دايم خليك في السيف سايد وخليك واضح و صريح من البداية

لا تكذب ولا تلف وتدور ولا تقول نص الحقيقة

الراحة النفسية اللي تجي مع الصدق بالنسبه لي مالها ثمن

في كل حياتكم خليكم صادقين و صريحين

٥- جمالُ الروح ذاك هو الجمال 

كثير ناس إذا بيوصفون لك أحد ما تعرفه ما يتكلمون عن شخصيته أو أخلاقه

يوصفون الشكل الخارجي!

الإهتمام بالمظاهر غريب ! وأنا كنت كمان أحكم على الناس من شكلهم وكنت أحب أتعرف في الجامعة على البنات المرتبين ..بس كثير منهم طلعوا “من برى الله الله …” لذلك الآن  الشكل آخر شي ممكن أفكر فيه إذا قدامي شخص يضيف لي و يفيدني.. أو شخص يقدرني و يعزني

٦- العالم بيقولك لا كثير .. لا تحزن

يمكن يقولك لا لأنك لسى صغير أو منت جاهز أو تستاهل أحسن من اللي طلبته

٧- خيرة الله دائمًا أجمل 

دائمًا لمن كنت أقول لبابا شي بسويه أو نفسي فيه يقولي ” الله يكتب اللي فيه الخير” 

و لسبب ما أعرفه كانت هذي الجملة تزعلني

كنت أحسبه يقول كذا عشان ما بيجيب لي اللي طلبته! أو ما بيوافق لي .. و كمان كنت أخاف إنه الخيرة تكون في صرف هذا الشيء عني

لكن آمنت بجمال أقدار الله لمن حاربت بمعنى كلمة حاربت على وظيفة إدارية في مستشفى من ٨-٥

وجدًا زعلت إنها ما جاتني.. و رجعت حاولت أكثر من مره و كل مره كان يصير شي وتروح الوظيفة

و الحمدلله طلع قدري إني أتوظف في جامعة الملك عبدالعزيز كمحاضرة للغة الإنجليزية

لو وقتها أحد قال لي اصبري بتجيك وظيفة أحسن كان مستحيل أصدق لأنها كانت في نظري أفضل وظيفة

٨- إنت تقرر فين تبغى تكون في هذي الحياة

إنت اللي تحدد إذا تبغى تكون مهم؟ نافع؟ محبَط/محبِط؟ عاله على الآخرين؟ إتكالي؟ مستقل؟ ناجح؟ فاشل؟

٩- لا تلوم أحد على أي شيء يصير لك

لا تلوم الناس ولا الظروف على أي شيء يصير لك في حياتك

الأستاذة نقصتني ولا كان مفروض معدلي يكون أحسن

أختي جابت فيلم وسهرنا ولا والله كنت بذاكر للإختبار

ماما قالت لازم أجي معاها السوق ما مداني

اللي سوت لي المقابلة الوظيفية نفسيه ولا أنا بدعت

الناس مستقعدين لي في الوظيفة ولا أنا أبغى اشتغل!

STOP IT NOW

كل شيء يصير لك تعلم منه.. شوف فين غلطت وفين انغلط عليك .. 

لا تكون سلبي و تستنى كل شي يصلح نفسه

١٠- دائمًا ركز على الهدف

هدفي المعدل؟

هدفي التخرج؟

هدفي أخلص البحث؟

هدفي أنظف البيت؟

هدفي أسعد أهلي/صاحبتي؟

و كملوا المهمة للأخير وانتوا غاضين النظر عن كل منغص ممكن يعرقلكم..

١١-القرب من الله :فوز و غنيمة ونجــاه

عمري ما ندمت على صلاة وتر صليتها 

و عمري ما فقدت أثر الصدقة الفوري في يومي

و أبدًا ما خذلني فعل الخير للناس

من يفعل الخير لا يعدم جوازيه

لايذهب العرف بين الله والناس

١٢-إحساس الخوف مزعج

تعلمت إني قد ما أقدر ما أخليه يسيطر على إحساسي

في الجامعة كنت ما آحب أسوي برزنتيشن بس كنت أحس إني لو وقفت بدال اللي تتكلم بكون أحسن منها!

واجهت الخوف و وقفت.. صح أول مره جبت العيد و ضحكت أكثر مما تكلمت و انخسفت درجتي بس عادي كتجربة أولى كنت مبسوطة بنفسي

و اليوم الحمدلله أنا مدربة معتمدة باللغة العربية في التدريب و التطوير من المعهد الفني للتدريب

و مدربة معتمدة باللغة الإنجليزية من كيمبردج 

١٣-الثقافة تقرّب مننا الناس الصح

من وقت ما مشيت على مبدأ “يجب أن أعرف شيء عن كل شيء و كل شيء عن تعلم اللغات و تدريسها” و صرت أقرأ و أطلع على مختلف العلوم والأخبار 

صرت ألقى كلام أقوله مع الناس المثقفه و الراقيه وصرت أجذب لحياتي ناس إيجابيه منفتحه للعلم و الحياة

١٤- القراءة تعلمني أكثر من أي شي ثاني

كل المعلومات اللي أخذتها من الكتب مازالت في بالي ومانسيتها..

كل الشعر اللي حفظته من الكتب ما نسيته

١٥- مافي فايدة من التظاهر بإني أصغر!

استغرب من ناس يصغرون نفسهم و يتظاهرون بعمر غير عمرهم!

أحس كأنهم يلغون سنين من حياتهم!

العمر هو زمن إحنا ماشيين فيه.. مو إنجاز إن الواحد عمره ٤٥ ولا فخر إن الواحد عمره ١٩!

الإنجاز هو لمن يصير عمرك مثلًا ٣٠ ارجع لحياتك ورى و شوف هل أنجزت فيها ما تستحقه فعلًا؟ ولا تخاذلت!

١٦- القلق يضخم الأمور

أحيانًا يكون فيه موضوع بسيط محد يلتفت له بس لأني أقلق بزيادة أتخيله صار قضية دوليه..

و فالنهاية ما استفيد أي شي من قلقي! حتى تفكير سليم وقت القلق ما أقدر أفكر

١٧-ما أحب أحس إني مقيده

و أكبر عدو لي في هذا الخصوص هو التسويف

لمن أسوف أحس إني مقيده ورايه شغل! 

عشان كذا تعلمت أسوي قائمة بالمهام كلها و أحدد أهمها عشان أحس إني حره أول ما أخلصهم

١٨- الوحدة حلوه أحيانًا!

كنت زمان أحس الحياة ما تحلى إلا مع الناس

بس طلعت غلطانه.. ممتع جدًا إنك تكتشف مدينة ما لحالك.. تتفرج لحالك.. تتسوق لحالك و حتى تروح مطعم و تاكل أو تتقهوى لحالك

الموضوع فعلًا ممتع و يستاهل التجربة

بس انتبهوا لا تدمنونه

١٩- لا تفكر كثير إن الناس تغار منك

مو كل تصرف يضايقك من الناس معناته إنهم يغارون منك ويكرهون نجاحك!

لا تسوي لنفسك هاله و تحبس نفسك فيها

التصرفات السيئة تحتمل أسباب كثيرة

مو شرط إنه كلها غيره! لأنه لو حطيت كذا ببالك بدون ما تحس بيصيبك الغرور، وبتوقف إنك تتطور أكثر لأنك بتؤمن إنك أحسن واحد فالحياة!

٢٠- كل عيوبي قابلة للتعديل

الموضوع بس يحتاج عزيمة و إرادة حقيقية

٢١- باقي لي عشرة سنين عشان أقول “ربي أوزعني أن أشكر نعمتك التي أنعمت علي و على والديّ و أن أعمل صالحًا ترضاه ..” بس من الآن متحمسه أقولها 

٢١- تعلمت أحب نفسي 

جلد الذات عندي كان جدًا يمنعني إني أسوي شي أو حتى أتحسن .. كنت كثير أرسل لنفسي رسايل إحباط

كنت أقدم خدمة الناس على نفسي..

كنت فاشلة في استغلال قدراتي و التخطيط ليومي فسمحت للكل إنه يستغل هذي القدرات و يستخدمها 

بس تعلمت إني لو ما حبيت نفسي و رضيت عنها محد بيتقبلني 

لذلك عرفت أقول لا ..

ما أقولكم إني صرت master بس الموضوع في تحسن مستمر

 tumblr_n7p0bvKwsc1r4jb1do2_400

٢٢-آكل اللي يعجبني و ألبس اللي يعجبني برضه

مو لازم أتبع ستايل أحد .. ما أرتاح إلا لتنسيقي و طريقتي و صدقوني مره مو لازم تعجب كل أحد <ارجعوا للنقطة رقم ١ 

٢٣-الناس السلبية ترسل ذبذبات مزعجة

عشان كذا أحاول أبعد عنهم قد ما أقدر..

وكمان ما أشاركهم الحكايات اللي تهمني لأنهم بيطلعون لي فيها شي سيء 

٢٤- “يقولون مالا يفعلون”

كنت استغرب من كمية الحكم و العبارات الحلوة اللي مليانه خلق نبيل المنتشرة في كل وسائل التواصل الإجتماعي ..و كنت اسأل إذا كل الناس هذي مبادئها أجل مين الناس اللي نشوفهم في حياتنا؟؟

و تعلمت لاحقًا إن الناس يقولون مالايفعلون

٢٥-أنا قدوة كثير من البنات

و هذا من أسعد و أجمل الأشياء اللي صارت لي و تصير لي..

لمن يجي أحد يقولي إنتِ قدوتي و أنا أحاول أصير زيك و هدفي أكون ناجحة كنجاحك.. من جد هذي من أكثر الأشياء اللي تخليني أحاول قد ما أقدر إني أتطور

٢٦- كل مشكلة في الحياة تعدي ..

مو لازم يكون لها حل، بس يمكن نتعود عليها و نتأقلم مع فكرة وجودها 

فالله لا يكلف نفسًا إلا وسعها..

٢٧-الناس اللي تساعدني لها مكان خاص في قلبي

ما أقدر أنساها ولا أزعل منها 

٢٨- تعلمت إني أقدر أبدع لو حبيت الشيء

و لو ما حبيته أرفضه على طول 

٢٩- الأكل متعه بس مو هوايه

و هذا درس تعلمته متأخر .. 

لأنه إلى وقتٍ ما كان الأكل بالنسبه لي تسليه ..

الناس تطفش تروح تتفرج أو تقزأ.. أنا كنت أروح آكل -ـــ-

٣٠- الدنيا دواره

كل شي نسويه بيرجع لنا يوم

إن خيرًا فخير و إن شرًا فشر

فالنهاية.. الله يمد أعمارنا على طاعة الله بالصحة و العافيه و يبارك لنا فيما بقي و يغفر لنا ماقد مضى 

و كل سنه و أنا أتفزلك على راسكم 

فتّكوا بعافيه

Teaching and Learning ENGLISH

How to Improve your Academic Writing Skills

كيفية تطوير مهارات الكتابة باللغة الإنجليزية عمومًا .. و الكتابة الأكاديمية خصوصًا.

قبل كم يوم كنت ضيفة في سناب سعوديون في بريطانيا و تكلمنا عن طرق تساعدك في تطوير و تنمية مهارات الكتابة الأكاديمية في اللغة الإنجليزية.

هذا سنابهم : @saudi.uk

و هذي قناتهم في اليوتوب: https://www.youtube.com/channel/UCayR41Y4RBHdWeBpoA0v8PQ

الموضوع يهم الطلاب عمومًا و الموظفين و كل شخص يحتاج يكتب إيميلات و رسائل in a formal way

فهنا بيكون ملخص لكلامنا و مرجع لكم ..

١- اعرفوا الهدف من كتابتكم عن طريق إجابة الأسئلة التالية:

  • Who are you writing for?

  • What are you trying to achieve?

  • What does your reader want?

لأنه كل مشرف أو أستاذ يطلب منك شي معين .. فلازم أول شي تعرف إيش مطلوب منك و على أساسه تبدأ..

٢- خطط لموضوعك ..

الخريطة الذهنية دائمًا هي الحل

ارسم خريطة ذهنية لأفكارك وتفرع من الفكرة العامة للأفكار الجانبية و من كل فكرة طلع كم سهم للأمثلة و الأدلة و الشرح

مثال :

Basic-Mind-Map-Structuremindmap

في الخريطة الذهنية أو في تخطيطك عمومًا جاوب على الأسئلة التالية:

  • What ideas are you going to include?

  • What ideas are you going to leave out?

  • How are you going to organize your ideas?

و إنت تجاوب على السؤال الثاني وتقرر إيش الأفكار اللي تبغى تكتبها حط في بالك شيئين مهمين جدًا

  • Think about your goal.

  • Think about your readers need

٣- رتب أفكارك into clear paragraphs

بمعنى إنه لازم كل برقراف يحتوي على فكرة رئيسية واحدة

هذي الفكرة الرئيسية لا تحاول تحشرها كلها في برقراف واحد هي و أمثلتها و أدلتها و شرحها.. قسم الفكرة إلي ٢-٣ برقرافات حسب عدد الكلمات المطلوب منك

و عمومًا مافي عدد معين من الكلمات لكل برقراف برضه يعتمد حسب المطلوب منك .. هل هو واجب من ٢٠٠ كلمة أو بحث من ٣٠٠٠ كلمة

٤- اختصر 

eat empty words and sentences

قلل عدد الكلمات قد ما تقدر

لا تخلي هاجس الوصول لعدد الكلمات المطلوب يشغلك عن جودة أفكارك و صحة كتابتك

مثلًا  بدال ما تكتب … اكتب:

very tired –> exhausted

As a result –> consequently

could,might may X حاولوا تقللون منها قدر الإمكان لأنها تضعف كتابتكم

advantages and disadvsntages for this –> Two sides to this issue are …

Don’t -I’m –> Do not – I am ( avoid contradiction )

There is +there are X

There are two sides to this issue –> Two sides to this issue …

Exaggerating words: 

Very hard –> difficult

really controversial –> controversial

Passive voice –> active voice

صيغة المبني للمجهول خاصة لو كثرت تضعف مستوى كتابتك لذلك حاول تتفاداها

weak verbs –> strong vers

made and objection –> objected

و هذي النقطة بالتحديد ما نقدر نطورها و نعدلها إلا بتعلم المزيد من الكلمات و زيادة حصيلة الـvocabulary

لأنه استخدام الأفعال الضيعفة عشان نوصل المعنى دليل على ضعف لغتنا و افتقارنا لمعرفة الكلمات المناسبة للتعبير.

٥- ركز على الهدف 

لذلك دائمًا يقولون keep it simple

عشان ما تضيع ولا تضيّع القارئ

ركز على هدفك من الرايتنق و هدفك من البرقراف و هدفك من المثال

لا تطول الجمل .. البعض يحاول يخلي جمله advanced وبالتالي يظيح في فخ الـ run-on

هنا فيه شرح واضح لمعنى الـ run-on

0fdd0283-f753-4253-8687-46f734a946f2_runon1.png

٦- دائمًا خلي عندك كولكشن جاهز من الـphrases +linking words 

احفظهم زي اسمك و علقهم في كل مكان عشان يسهل استخدامهم عليك

هذي أهم الموضوعات اللي تحتاج لها فريزز و كلمات ربط

Compare-contrast- give examples- give your opinion- generalise- express certainty- express partial agreement- show cause- show effect- mark time- add information- express condition- conclude

عندي كلمات جاهزه لكن صدقوني لو بحثتوا عنها و جمعتوها بنفسكم عمركم ما بتنسونها و بتستفيدون أكثر من لو لقيتوها جاهزه

7- Read the right materials

لا تقرأ والسلام! يروح يومك كله و إنت تجمع تجمع في المصادر وما يمديك تقرأ إلا مقالات ما تحتاجها

لذلك مهم جدًا تعرف موضوعك و هدفك من الكتابة و تركز على المصادر اللي تنفعك

شوف الناس اللي كاتبين في نفس موضوعك كيف كتبوا ؟

على إيش ركزوا؟

كيف قسموا الموضوع ؟

كم احتاجوا عينه أو دليل في دراستهم؟

قراءة المقالات أفضل بالنسبة لي من قراءة الكتب لأنها تعلمك كثير و تفيدك

الكتب كمان مهمه وفيها معلومات كثيرة ومن ناس غالبًا لهم خبرة طويلة

٨- تدرب – تدرب -تدرب

ماقدر أقولكم التدرب على الكتابة و ممارسته كيف مهمه جدًا..

مهما قرأتوا موضوعي أو عشرين واحد زيه ما حيكون فيه فايدة أبدًا لو ما كتبتوا بيدكم و بحثتوا وغلطتوا ألف مره لين توصلون للمستوى اللي يرضيكم

التدرب و الممارسة أولًا و أخيرًا هي مفتاح النجاح في كل مهارة

٩- راجع كتابتك

بعد ماتخلص اترك اللاب توب يومين أو ساعتين .. خذ بريك أو سوي أي شي بعيد تمامًا عن الموضوع اللي كتبته

و ارجع بعدها راجع اللي كتبته.. بتلقى أخطاء بسيطة سواءًا نحويه أ إملائية ..لا تعدلها أول بأول .. ظللها بس و كمل عشان لا تقطع حبل أفكارك و بعدين ارجع رتبهم كلهم وصححهم مرة وحده

١٠- اطلب من شخص آخر قراءة عملك

Proofread your work

ممكن ترسله لناس مختصة أو ممكن تعطيه لشخص من معارفك تثق بقوة لغته..

و هذا أبدًا مو دليل إنك ضعيف أو هو أحسن منك! دائمًا نحتاج fresh eyes عشان تقيم عملنا  لأنها بتشوف أشياء إحنا غفلنا عنها تمااااماً ..

أتذكر دكتوري في مرحلة الماجستير لمن انهرت تمامًا من جملة (You are not ready yet for Masters) على أول واجب تجريبي انطلب مننا ،لأني ما راجعته ولا خليت أحد يراجعه، قال لي أنا لمن أكتب بحث أو أسوي دراسة أو حتى أكتب مقالة عادية لازم أخليها كم يوم و أرجع أراجعها و أطلع منها أخطاء كثيرة وبعد ما أخلص أرسلها لزميل لي أنا أراجع له وهو يراجع لي .. وقتها أعتمد العمل و أرسله 

حتى في العمل أول ما بدأت كان شغلي يتطلب مني إني أرسل أقل شي إيميلين يوميًا لناس تتكلم اللغة الإنجليزية بطلاقة و بعضهم الإنجليزية هي لغتهم الأم، فكنت أخاف أكتب شي غلط و دائمًا بعد ما أخلص أطلب من صاحبتي تراجع كتابتي و وقتها أعتمدها 

١١- أخيرًا ..

هنا بعض المراجع و المواقع اللي ممكن تفيدكم بإذن الله

طرق فعالة لتفادي الـ run-on sentences

1- https://academicguides.waldenu.edu/writingcenter/grammar/runonsentences

Academic Phrasebank

1- http://www.tina-freyburg.eu/1/135/resources/document_1053_1.pdf

2- https://www.maailmakeeled.ut.ee/sites/default/files/fl/linking_words_and_phrases.pdf

How to improve your Academic writing skills

1- http://www.proofreadingservices.us/academic-writing/

2- http://sydney.edu.au/stuserv/learning_centre/help/styleStructure/style.shtml

هذا المقال مره مره مره مره لا يفوتكم ممتع جدًا و مفيد جداً جدًا

https://www.enchantingmarketing.com/how-to-improve-writing-skills/

Benden bu Kadar 👋

ARTICALS, Minimalism

Minimalist Series(3)..توفيـر المال

minimalism

و وصلنا للحلقة الثالثة و الأخيرة من موضوع الإعتدال و How to be a minimalist

صبـا بنت أختي الله يسعدها ساعدتني في تصميم بعض صور هذه السلسلة وكانت دائمًا أول قارئة

seviyorum Seba ❤

..

وحدة من أهم أهداف الإعتدال و التخفيف و التخلص من الأشياء اللي ما نحتاجها أو اللي مثقله علينا .. هو إننا نوفر الفلوس

مو معناته إننا نصير بخلاء، ولا معناته إننا نحرم نفسنا من أشياء تمتعنا أو تفرحنا

لكن معناته إننا نخلي الفلوس لأشياء أهم و أكبر..

مثلًا كم بنوفر لو بطلنا نشتري قهوة من برى و تعلمنا نسويها في البيت؟

كل يوم ١٥ ريال على أقل تقدير.. صدقوني ما تجي الإجازة إلا و عندكم حق تذكرة سفر لمكان جديد ما قد زرتوه..

 

2018-03-10-PHOTO-00000302

خلونا نشوف أفضل ٢٠ طريقة لتوفير المال وإنفاقه بحكمة أكبر:

١- الحاجة Vs. الرغبة:

دائمًا اسألي نفسك .. هل أنا أحتاجه ولا أبغاه بس لأنه حلو؟

هل أحتاجه ولا بس لأنه عليه تخفيض و سعره ما يتفوت ؟

هل أحتاجه ولا لازم اشتريه لأنه هو التريند ؟

٢- دائمًا خلي معاك كاش بدال بطاقة الصراف

بالبطاقة ما بتحسين قد إيش صرفتِ وقد إيش اشتريتِ، لكن لو معاك مثلًا ٢٠٠ ريال بتعرفين تصرفينها على الأشياء المهمة وبيصير عندك هدف وإنت تتسوقين.. والعكس تمامًا بيصير لو معاك البطاقة

٣- لا تروحين السوق إلا لو عندك قائمة بالأشياء اللي تحتاجينها

لا تروحين السوق بدون هدف عشان لا تشترين شي ما تحتاجين له.. اللست بتحدد لك أهدافك، حتى بتعرفين بالضبط وجهتك فين تكون.. مول ولا صيدلية ولا سوبرماركت! بدال ما تروحين مول عشان بس سوبرماركت وينتهي بك الحال بين زارا و فيمي٩

٤- Snap a picture

لو عجبك شي لا تشترينه على طول خاصة لو كنتِ بتجربين ستايل جديد.. صوري نفسك، وشوفي الصورة ثاني يوم.. لو عجبك اللبس خذيه و إن حسيتِ إنه مو لا يق عليك خلاص..

٥- قارني الأسعار

مع انتشار مواقع و تطبيقات التسوق اللي تجمع تحت سقفها ماركات عالمية كثيرة جدًا .. لا تستعجلين في الشراء و قارني الأسعار.. بعض المواقع يكون عندها عروض أو كود خصم ممكن تستفيدين منه

٦- ألغي كل اشتراكاتك في مواقع التسوق اللي ترسلك نشرة اسبوعية أو يومية بالتشكيلات الجديدة للملابس و الإكسسوارات و غيرها.. و أحذفي كل التطبيقات..

أنا مثلًا حذفتها من الجوال و خليتها بس في الآيباد عشان مو كل يوم أفتح و أعبي السلة و أتحمس

٧- لمحبين القراءة..استعيروا الكتب

مو شرط كل كتاب تنوون قراءته تشترونه أو تضيفونه في مكتبتكم.. ممكن تشتركون في أندية القراءة و تتبادلون الكتب مع أعضاءها.. و ممكن تتابعون حسابات القراء اللي كل فترة يسوون Giveaway لمجموعة كتب..

و ممكن تستعيرون من مكتبة الجامعة أو مكتبة الملك فهد العامة وهذا بيوفر عليكم كثير

٨- تعلموا بعض المهارات ..

مثلًا  للبنات: تعلموا تسوون حواجبكم بنفسكم وتعلموا تضبطون مكياجكم أو تسوون شعركم..

أعرف كثيييير بنات ما يروحون الصالونات إلا في الزواجات العائلية المهمة يعني زواج أختها أو أخوها أو زواجها هي بنفسها .. غير كذا ماشاء الله يعتمدون على نفسهم في كل شيء

و الأولاد: غسلوا سياراتكم بنفسكم، أتوقع الموضوع طالما فيه مويه و صابون فهو ممتع جدًا ..

و جيبوا طلباتكم بنفسكم.. مشاريع مثل مرسول في ظني أنها وجدت للفتيات ، بس انصدمت لمن لقيت أولاد يطلبون أكل أو أي نواقص عندهم عن طريق مرسول !!

٩- كونوا صريحين مع نفسكم ومع الناس ولا تجاملون على حساب ميزانيتكم

صاحباتك طالعين يتغدون سوا في مطعم إنتِ عارفة إنه ميزانيته كبيرة عليك ولسى عندك مسؤليات لين آخر الشهر .. لا تستحين إنك تعتذرين و تقولين لهم بكل صراحة I can’t afford it

أو ممكن تقترحين عليهم مطعم أرخص..

حتى مع نفسك، لا تشترين شي غالي عليك بس لأنه عجبك، قولي لنفسك و بكل وضوح You don’t need this, plus!! I can’t afford it to you

save-your-money-and-dont-buy-cheap-seo

١٠-مافي شي اسمه “مودي اليوم سيء”ولازم أروح السوق أرفه عن نفسي..

وعن أبي أمامة  رضي الله عنه ، قال : إن حبرا من اليهود  سأل النبي – صلى الله عليه وسلم – ، أي البقاع خير ؟ فسكت عنه ، وقال : ( أسكت حتى يجيء جبريل  ) ، فسكت وجاء جبريل  – عليه السلام – ، فسأل فقال : ما المسئول عنها بأعلم من السائل . ولكن أسأل ربي تبارك وتعالى ، ثم قال جبريل  : يا محمد  ! إني دنوت من الله دنوا ما دنوت منه قط ، قال : ( وكيف كان يا جبريل  ؟ ) ، قال : كان بيني وبينه سبعون ألف حجاب من نور ، فقال : شر البقاع أسواقها ، وخير البقاع مساجدها ، رواه ابن حبان  في صحيحه عن ابن عمر  .

لذلك.. لازم نشيل من بالنا فكرة إنه السوق بيغير مودنا للأحسن

السوق نقضي فيه حاجياتنا و نطلع منه سواء كانت تسوق لأغراض نحتاجها أو ملاهي للأطفال أو مطعم ناكل فيه..

القصد إنه روحتنا له تكون لغرض نؤديه و نطلع منه.. مو عشان نروح نلفلف فيه و نغير جو!

١١-دائمًا راقبي مصروفاتك

و كل آخر شهر شوفي فلوسك أكثر شي فين تروح؟

و كيف تنصرف؟

و كم يبقى لك من الراتب أو المكافأة أو دخلك عمومًا..

١٢-جهزي أكلك/قهوتك بنفسك

و ذكرت نقطة القهوة في بداية التدوينة لأنها فعلًا صرفيه كبيرة إحنا في حاجتها ..

ممكن كوب قهوة as a treat بعد كل فترة أو مكافئة على إنجاز معين.. مو كل يوم و بدون سبب

حتى لمن تكون مكافأة يصير لها طعم

حتى فطورك .. جهزيه من الليل

و هذي النقطة مره نفسي التزم فيها لأنه لمن أجوع في الدوام وأحتاج آكل .. الخيارات ما تكون مره ممتازة لكنها مقبولة نوعًا ما .. بس أقل شي أصرفه ٢٠-٣٠ ريال

لو جهرت فطوري من البيت ما بيكلفني ٣-٥ ريال تخيلوا!

١٣- لا تروحين السوبرماركت و إنتِ جيعانه

فجأة بتلقين نفسك مشترية أشياء عمرك ما أكلتيها بس شكلها في الرف عجبك و تخيلتِ نفسك و إنتِ تاكلينها .. الكارثة لو أخذتِ منها أكثر من حبه

١٤-اشتري المواد الغذائية بالجملة و تعلموا طريقة تخزينها الصحيحة .. بكذا توفرون على نفسكم حتى المشاوير الصغيرة للبقالة كل كم يوم عشان تشترون النواقص ..

خصوصًا الحبوب و الرز و السكر و الزيت و الشاهي و اللي غالبًا العدد الكبير منها يكون عليه عرض

١٥-التزموا بحضور الوجبات الرئيسية في البيت مع أهلكم.. غير فائدتها النفسية العظيمة، إنت كمان بتوفر حق غدا أو عشا برى البيت بمبلغ يمكن تشوفه اليوم بسيط بس آخر الاسبوع بتلقاه كلفك حدود ٢٠٠ ريال

١٦-خلوكم صحيين و اشربوا مويه كثير

الأكل الصحي أرخص من الجنك فود .. صحن سلطة تجهزينه في البيت ما يكلفك زي وجبة من I’m Hungry

You know what I mean?

١٧-استخدموا الأشياء عند انتهاءها لأغراض أخرى

مو أمهاتنا يستخدمون العلب لمن تفضى و يغسلونها وفجأة تلقين علبة صلصة فيها هيل وقارورة ورق عنب فيها بهارات شوربة و كذا؟

مع إنه الشكل صراحه ما يعجبني، خصوصاً شكل الأغطية لكنها وحدة من الطرق لتوفير المال..

١٨- هذي الطريقة جدًا أحبها لأني أكره المكيف

قبل النوم بساعة شغلوا المكيف و خلوا الغرفة تبرد و وقت النوم بتلقون الغرفة باااردة.. وقتها قفلوا المكيف و ناموا بدونه ..

أوكي أهل جدة بما إنه الحر وصل عندنا صعب تطبقونها أنا عارفة، بس ممكن توفر لكم كم ساعة بدون مكيف في وقت الذروة

١٩-اشتريتِ شيء غالي و انتهت حاجتك له؟ ما ناسبك؟ وصلك هدية وما حبيتيه؟

بيعيه.. مره مو عيب ولا حرام

منها ما رميتيه ولا جلس قدامك بدون فايدة و كمان استفاد منه شخص ثاني و إنتِ كسبتِ فلوس

بس أهم شي الأمانة عند البيع

٢٠- في اشتراكات في السوبرماركتات و المحلات التجارية تعطيك خصومات و عروض

حتى بعض الكافيهات تعطيك بطاقة تختمين عليها مع كل عملية شراء و بعد عدد معين تحصلين على مشروب مجاني

بنده مثلًا عندهم نقاط تحولينها لمشتريات مجانية

بطاقة نادي الإمتيازات من كل محلات الشايع في المملكة

و بطاقة شكرًا التابعة لسنتربوينت و كوتون و كم محل ثاني..

هذي كلها تجمعين فيها نقاط و بعدها تجيك خصومات أو هدايا من المحلات..

دائمًا اسألوا عنها في المحلات و اشتركوا فيها ..

 

هذي عشرين نصيحة بتفيدكم بإذن الله تحافظون على الفلوس وماتصرفونها في أشياء عادية جدًا وما تنقص شي منكم لكنها بتصنع فرق عظيم في رصيدكم

و ممكن لو انجزتوا تكافئون نفسكم آخر السنه حسب المبلغ اللي وفرتوه

ممكن يجيب لكم سفرة كاملة

و ممكن شنطة!

و ممكن عشا في مطعم ما قد زرتيه

و ممكن كوب قهوة

إنتوا وشطارتكم

 

لو عندكم tips تساعدنا نوفر فلوسنا شاركونا  هي في الردود أسفل التدوينة

 

و أعطوني اقتراحاتكم لمواضيع حابين نتكلم عنها الأسابيع الجاية

 

فتكوا بعافيه

ARTICALS, Minimalism

Minimalist Series(2)..فوائد الإعتدال و التخفيف و تأثيره علينا

minimalism

Boo! 👻

مرحبًا بكم في الجزء الثاني من الـminimalism

اللي فاته الجزء الأول أو حطه في المفضلة و نسي يقرأه يشيك عليه من هنا

عندنا في هذي التدوينة ٣ نقاط نتكلم عنها :

١- أشياء يجب التخلص منها فورًا ..بارت٢

٢- فين نودي الأغراض اللي نتخلص منها و مازالت في حالة جيدة

٣- فوائد الإعتدال وتأثيره النفسي و الجسدي علينا

يلا نبدأ 🌟

minimalism-min

١- أشياء يجب التخلص منها 

  • صندوق الـtrash 

و آسفه إنه سميته كذا بس فعلًا هوأكثر بوكس في البيت ماله أي فايدة لو اختفى ولا انحرق ..

عبارة عن ذكريات الطفولة و الدراسة و السفر و كروت تهنئة و معايدة ومناديل مطاعم مكتوب عليها رسايل من صاحباتك و أول فاتورة دفعتيها و أول فاتورة دفعتيها بالقطة مع صاحبات الجامعة.

هذا غير كل الجوالات اللي استخدمتيها في حياتك من نوكيا الدمعة إلى الآيفون..

صحيح الذكريات جميلة وممتعة بس كثرة تخزينها أبدًا مو صحي.. غير إنه بعضها لو شفتيه ممكن ينقل لك مشاعر سلبية لأنها بتذكرك بإشخاص ما عادوا اليوم في حياتك لأي سبب كان.

قوي قلبك و رتبي هذا الصندوق و نظفيه و افسحي فيه المجال لذكريات جديدة جميلة .. الجوالات مافي أمل تبيعينها ولا في أمل أحد يستخدمها ، لذلك اتلفيها و تخلصي منها هي و سماعاتها و شواحنها.

الهاردسك الخربان اللي لسى عندك أمل تصلحينه برضه تخلصي منها

أي رسالة أو نوت نسيتِ من مين وصلك! أو نسيتِ سبب كتابته تخلصي منه

( أنا عندي عادة عبيطة عمري ما استفدت منها.. لمن توصلني هدية تغليفها حلو، أحاول أفتحها بشويش عشان بعدين لمن أهدي أحد أرجع استخدم التغليف نفسه.. و صدقوني عمري فحياتي ما سويت هذي الحركة. اكتشف بعد فترة إنه عندي تغليفات قد الدنيا و أعصب إنها صارت مسويه زحمه و إني ما استفدت منها و فالأخير أرميها)

فلو لا سمح الله في أحد منكم عنده نفس العادة ياليت نبطلها 💔

  • الكتب

أي كتاب قرأته حاول تسوي له ملخص .. هذا الملخص بيفيدك جدًا تفهم بالضبط محتويات الكتاب و إيش استفدت منه.. و لو شاركت الناس الملخص اللي كتبته بتوسع الفائدة و تنشرها أكثر.. و بالنهاية ما بتصير بحاجة الكتاب

ممكن يكون عندك دفتر فيه تلخيص أكثر من خمسين كتاب و بكذا تكون وفرت على نفسك مساحة تخزين خمسين كتاب

دائماً ابحث عن محبين القراءة حولك أو في مدينتك و حاول تتبادل معاهم الكتب.. بتوفر حتى فلوسك في شراء كل كتاب تنوي قراءته..

( لو في أحد مهتم بكتب عربية و إنجليزية في مدينة جدة يبلغني لأني ناويه أوزع حوالي ٧٠ كتاب )

  • الأشياء اللي خربت 

أتوقع الكل لمن يخرب عنده شي خاصة لو كان جديد يخليه و يقول بوديه يتصلح .. و يمر اسبوع و شهر و ٦ شهور و يمكن سنه و هو مكانه ما تصلح!

بما إنه كل هذي الأيام عدت و إنتِ ما صلحتيه معناته هذا الشيء مو مهم في حياتك ولا تحتاجيه..

عندك خيارين:

١- تجمعي كل الأغراض اللي تحتاج تصليح في كيس و تخليها عند باب الخروج و تحاولي توصلي كل قطعة لمحل صيانتها خلال اسبوع

٢- تعترفي إنها شي مو مهم و تتخلصي منها

  • الأكل

هذا القسم ماقدر أتكلم فيه كثير صراحه لأني خايفه من ماما 😨

كله ولا أحد فينا يتدخل في المطبخ و يحاول يغير شي فيه، بس عمومًا..

خذوا لكم فرة على الثلاجة و شوفوا الأكياس اللي لها فترة طويلة و هي مكانها ما تحركت!

و العلب اللي ما استخدمتوا محتواها والحبوب اللي فدواليب المطبخ برضه لا انطبخت ولا حتى سويتوا منها ماسك للجسم!

و تخلصوا منها أول بأول ..

و اعتمدوا إنكم ما تشترون كميات كبيرة عشان تستغلون العروض! اشتروا قدر حاجتكم و حاجة عائلتكم فقط

نجي للأكل اللي إحنا ناكله 🙈

flat-v-minimal_02

لو أحد يقولك إنك تاكلين أكل ما تحتاجينه يمكن ما تصدقين و تجيبين له سبب لكل شي تاكلينه خلال يومك

لكن الحقيقة هي فعلًا إحنا كثير من أكلنا عبارة عن زيادة ما يحتاجها جسمنا بس نبغاها عشان طفشانين أو عشان جالسين في جمعة ولازم ما نوقف أكل أو عشان جالسين نتفرج فيلم أو أو أو ….

و هذا كله يبان بعدين في جسمنا و بشرتنا و نفسيتنا

منهج النبي صلى الله عليه وسلم فالأكل يتلخص في الحديث التالي:

عَنْ المِقْدَامِ بْنِ مَعْدِي كَرِبَ قَالَ: سَمِعْتُ رَسُولَ اللَّهِ ـ صَلَّى اللَّه عَلَيْهِ وَسَلَّمَ ـ يَقُولُ: مَا مَلأ آدَمِيٌّ وِعَاءً شَرٌّا مِن بَطْنٍ، بِحَسْبِ ابْنِ آدَمَ أُكُلاتٌ يُقِمْنَ صُلْبَهُ فَإِنْ كَانَ لا مَحَالَةَ فَثُلُثٌ لِطَعَامِهِ وَثُلُثٌ لِشَرَابِهِ وَثُلُثٌ لِنَفَسِهِ

و لهذا الحديث إعجاز و شرح جميل جدًا أتمنى أن يجد وقتكم له متسعًا بعد الإنتهاء من قراءة التدوينة على هذا الرابط

و الحديث الآخر ( نحن قومٌ لا نأكل حتى نجوع و إذا أكلنا لا نشبع) رغم أن إسناده ضعيف إلا أنه يحمل الكثير من الحكمة التي نحتاجها.. فالأكل هو لسد الجوع فقط و ليس للتسلية ولا لإضاعة الوقت ولا يندرج تحت الفاشن..

يعني مو لازم تشتري كل أنواع الخضار المستورد وتصورينه و تخلينه لين يخرب ما أكلتِ منه شي لأنه ببساطة ما يعجبك بس لازم مع الخيل يا هبلا!

ولا لازم تشتري كل أنواع الحبوب بس لأنك اشتركتِ في النادي ولازم تكملي البكج حق ( البنات الكول)

و أول طريقة عشان تخففي أكل هي إنك تكثري من شرب المويه

  • العلاقات الإجتماعية

و هذي النقطة قليل عليها تنكتب في كم سطر.. لأنها من رأيي تحتاج موضوع مستقل كامل

كيف ممكن نطبق مفهوم الـminimalism في علاقاتنا مع الناس

يعني ببساطة: وقفي مجاملة، و خليك صريحة مع نفسك قبل ما تكوني صريحة مع أي أحد ثاني

و شوفي الناس اللي حولك، اللي تقابلينهم في المدرسة أو الجامعة أو مكان عملك أو في جمعاتك، قد إيش يسعدونك؟ قد إيش يعطونك طاقة إيجابية؟ قد إيش يحفزونك تصيرين أحسن؟

مو مطلوب من الناس إنها تكون ملائكة، بس في ناس وجودهم في حياتك مضر

ناس سلبيه وكل كلامها حلطمة.. اسلوب كلامها مبني على الشكوى من كل شي(زوجها أهلها شكلها وضعها الحالي مشوارها الصباح حتى قهوتها ممكن تتحلطم عليها و على طعمها)

ناس محبطة كل ما قلتِ شي حسسوكِ إنه مستحيل أو ما يناسبك أ ما ينفع لك أو اعطوكِ ضحكة الـ إييييه هين يجيب الله مطر..

و ناس تكلمينهم و تسألين عنهم وما يجيهم منك إلا كل خير بس بالمقابل ما يسألون عنك ولا بريال!

ولا يشاركونك أخبارهم لا الحلوة ولا المره ..

و غيرهم كثير من الناس اللي فعلًا ما نحتاجهم في حياتنا

لازم نتخلص منهم ..و لمن أقول نتخلص منهم مو يعني نتضارب معاهم أو نزاعلهم، لا طبعًا

لكن ما نسمح لهم يسيطرون على أفكارنا ولا يعكرون مزاجنا ولا نشاركهم أي شيء يهمنا عشان لا يخربون فرحتنا أو حماسنا له

لازم نوقف مجاملة✋

٢- فين نودي الأغراض اللي تخلصنا منها ؟

الأغراض اللي بنخرجها و نتفق إننا ما نحتاجها تنقسم قسمين.

١- أغراض منتهية الصلاحية و ما تنفع لأحد إنه يستخدمها – هذي تروح للقمامة و انتوا بكرامة

٢- أغراض ما زالت بحالة جيدة أو جديدة لم تستخدم من قبل – هذي في أكثر من طريقة ممتازة للتخلص منها

١- التبرع فيها للجمعيات.. خاصة الجمعيات اللي تهتم بالفتيات المقبلات على الزواج. بيستفيدون من المكياج و الملابس و كل الأغراض النسائية .. لكن أحرصي إنك تقدمينها لهم في حالة جيدة و تكون نظيفة و في كيس مرتب عشان أجرك يزيد بإذن الله و تفرحينهم

٢- ممكن تعطينها لأخواتك أو صديقاتك يستفيدون منها . مثلًا أحمر شفاه أو أحمر خدود اشتريتيه ولا ناسب بشرتكك أعطيه لحدة من أخواتك و قوليلها أنه ما ناسبك..

٣- الفكرة اللي طبقتها قريب و جدًا جدًا انبسطت فيها

جمعت العطور و المكياج و كم غرض ثاني ما عاد أحتاجه و جمعت بنات أخواتي وقسمتهم فريقين و سويت لهم مسابقة منوعة بين أسئلة ثقافية و لغويه و ألعاب حركية.. و قبل كل سؤال كنت أطلع غرض من الصندوق و أقولهم هذي بتكون جائزة الإجابة على هذا السوال.

حماسهم كان مليووووون و لأنهم لسى مو في سن استخدام المكياج أو شراءه، انبسطوا إنهم طلعوا بكم قلم روج و مناكير و عطر

فهذي فكرة ممكن تطبقونها 💡

٣- فوائد الإعتدال والتخفيف و تأثيره النفسي و الجسدي علينا

١- بيزيد معدل السعادة عندنا بشكل كبير لأننا شاركنا غيرنا أغراض هم في حاجتها وبالتالي وفرنا عليهم مصاريف

بنكون مبسوطين لأننا عرفنا اللي نحتاجه و عرفنا نحدد أهدافنا من كل شيء حولنا

٢- بنوفر فلوس كثيييييييير أكثر مما نتخيل و نتصور.. لمن كل مره قبل لا أشتري اسأل نفسي: هل أبغاه ولا أحتاجه؟ صدقوني أشياء كثير بنبطل نشتريها

٣- بنحافظ على البيئة.. لمن نسوي تدوير للمنتجات و نعطي اللي ما ناسبنا لأشخاص يناسبهم بنوفر كثير

٤- بنتخلص من كل المشاعر اللي كانت تربطنا فيها بعض الأغراض.. لمن أرفع فواتير و أوراق و أشياء مالها معنى فعلي لكن بس لأنه لها مشاعر معينة حدثت في وقتها، تخلصنا منها بيساعدنا كثير نتحرر من كل هذي المشاعر

٥- بنخفف من التوتر و نصفي ذهننا لمن نتخلص من كمية الأشياء الرهيبة اللي كانت مملية الرفوف و الأدراج والمشاعر اللي كانت مملية القلوب و التوتر اللي يسببه لنا حضور أو وجود بعض الأشخاص

٦- و لمن يخف التوتر و يصفى الذهن.. بيزيد الإنتاج و يكثر الإبداع بمعدل عالي

٧- بيكون عندنا وقت فراغ زي ما بتصير عندنا مساحات فاضيه .. نقدر نستغلها في تنمية هواياتنا أو إنجاز مهامنا بدون أي عائق

٨- لمن أعرف إنه عندي القدرة إني أشتري الشيء الفلاني وما اشتريته، بيزيد معدل ثقتي بنفسي لأني قادرة على ضبطها و أقدر أسيطر على رغباتها مهما على صوتها.

و بكذا نكون خلصنا من الجزء الثاني من موضوعنا..

التدوينة الجايه بإذن الله بتكون الجزء الأخير و موضوعها

How to save up money as a minimalist?

متحمسة جدًا لمشاركاتكم في خانة الرد أو علي أحد حساباتي في مواقع التواصل الإجتماعي..

لو عجبكم المقال لا تنسوا تشاركوه مع حبايبكم

و فتكوا بعافيه 👋

ARTICALS, Minimalism

Minimalism Series (1).. ماهو مبدأ الإعتدال؟

f545d22b-d867-4af7-b248-850c95d12bbe

و كالعادة Late better than never

و هذي المره من كثر ما صرت into the subject I’m reading about!

ومن كثر ماهو a lifestyle more than a simple topic to discuss only once!

كل ما أجي أنزل التدوينة أحسها تحتاج معلومات أكثر..

لذلك قررت إني اقسمه على أكثر من تدوينة .

اليوم بنتكلم عن:

  • إيش هو مبدأ الإعتدال ؟؟What is minimalism?

  • كيف نبدأ؟

  • How to be minimalist?

  • إيش هو مبدأ الـ ٩٩؟

  • إيش الأشياء اللي أحتاج أتخلص منها -الجزء الأول

 

..

What is Minimalism?

It means living a simple life.

It means “less is more

It means that you think wisely!

It means knowing the meaning of success and happiness 🙂

It means live a good fulfilling life

It means living for less to have a space for more !

المصطلح هذا يعني الإعتدال يعني إننا نعيش حياة واعيه، نشتري اللي نحتاجه مو اللي نبغاه و نصرف بعقل و نخفف من كل الأشياء اللي ما نحتاجها حولنا.. نعرف المعنى الحقيقي للسعادة و نعرف الأشياء اللي حولنا هل هي تسعدنا فعلًا  ولا أشياء زايدة ما يجينا منها غير طاقة سلبية؟

مبدأ الإعتدال بدأ في العالم الغربي من فترة بسيطة لكنه حاليًا من المواضيع الترند اللي أفضل الكتب تتكلم عنها و أفضل المواقع تناقشها و البعض صار عندهم مشاريع مبدأها التخلص من كل ما لا تحتاج إليه.

هذا المبدأ يندرج تحته الـdecluttering and also saving money and many many things.

images-2

اليوم بنتكلم عن كيف نبدأ وكيف نخلي الإعتدال minimalism بالنسبة لنا اسلوب حياة ودائمًا له مكان في جداولنا مو شي نطبقه مره وحده و بس!

١- لازم نكون في حالة وعي تام إننا نحتاج نغير بعض العادات السيئة عندنا و اللي تختلف من شخص للثاني.. نقصد بهذي العادات هي كل عادة تخلي عندنا شعور سلبي إحنا في غنى عنه..

مثل إدمان التسوق في المولات-إدمان زيارة الصيدليات و تجربة كل المستحضرات و المنظفات-إدمان مواقع التسوق على الإنترنت وعروضها

إدمان البحث عن رضا كل الناس من حولنا-إدمان إسعاد الناس ولو على حساب نفسنا-إدمان أمهاتنا المتعلق في شراء الصحون وكل أغراض المطبخ اللي غالبًا مايستخدموها إلا مره وحده!

٢- لمن نوصل لمرحلة الـ Onagi على قول Ross!

وقتها نقدر نبدأ بكتابة الخطة

٣- دائمًا عشان ننجح في الوصول لأي هدف لازم نقسمه لخطوات صغيرة

يعني ما ينفع نبدأ فجأة و نطبق مفهوم المينيماليزم على كل شيء.

٤- أول شي أبدأي بالتخلص من الأشياء الزايدة اللي حولك في البيت و العمل

و أحلى بداية من غرفة النوم..

فقط غرفة النوم أعطيها اسبوع و قسمي الاسبوع كالتالي:

يوم التسريحة و يوم المكتب ويوم دولاب الملابس قسم ملابس الخروج فقط و يوم قسم البجايم و لبس البيت و يوم صندوقك اللي كله رسايل و ذكريات ومناديل مطاعم مكتوب عليها تاريخ منتِ فاكره مناسبته و فواتير انمسح الحبر اللي فيها وصارت ورقة صفرا غير مفيدة

 دائماً اتبعي هذي الخطوتين مع أي شيء ( عرفي الضروريات بالنسبه لك اللي تستخدمينها كثير أو كل يوم / وتخلصي من الباقي )

 لنفترض إنك بدأتي بالتسريحة، إيش بالضبط بتسوين؟ ترتبينها ؟تنظفينها؟ 

هذي البروسس بتجي تلقائيًا، لكن الهدف الأول هو التخلص من كل شيء عدى عليه فترة و إنتِ ما استخدمتيه..

أو منتج اشتريتيه ما ناسبك وخليتيه على أمل يوم يناسبك!

أو 

عطر أخذتيه على السمعة و بعدين ماعجبك.. أو عجبك في المحل و في البيت حسيتِ there’s no way you would use it

تحمستِ مره مع ماسكات شفتيها في النت و اشتريتِ كل الزيوت من عند العطار، بعضها استخدمتيه مره وحده وبعضها مافتحتيه!

رحتِ تشترين لقيتِ عرض اشتري حمرتين و الثالثة مجانًا وتحمستِ و أخذتِ لون روج مره ما يناسبك وجلس فالتسريحة!

كريمات ما ناسبت بشرتك! تونر طلع لك حبوب!مناكير يتقشر أو ثقيل أو أبو كلب بأي شكل من الأشكال 

الخطوة السابقة بتطول لأنك بتنكرين إنك ما تحتاجين هذي القطعة و هذا العطر و بتحاولين تقاومين قد ما تقدرين.لذلك في شي ممكن يساعدك، وهو تطبيق قاعدة الـ٩٩ ..

هذي القاعدة تتلخص في إنه أي شي عدا عليه ٩٩ يوم ما مسكتيه ولا استخدمتيه هو شيء ما تحتاجينه أبدًا

– حيكون عندك بوكسين أو كيسين، واحد للأشياء المنتهيه و اللي لازم تنرمي و الثاني للأشياء اللي مازالت جديدة أو قابلة للإستخدام

– طبقي هذي العملية ثاني يوم مع ملابسك ومع كل شيء حولك في الغرفة وشوفي كيف شكل الغرفة يتغير تمامًا ويصير عندك مساحات فاضيه في كل مكان (مساحات مو ضروري تعبيها بأي شي)

من الأشياء اللي تحتاج مننا جلسة تنظيم و ترتيب عشان نتخلص من اللي ما نحتاج له..الجوال و اللاب توب

افتحوا جوالكم وشوفوا إيش التطبيق اللي ما استخدمتوه آخر شهر أبدًا و احذفوه

بالنسبه لي حذفت تطبيق تذكير شرب الماء لأنه اكتشفت إنه مشكلتي مو فالتذكير فصار التطبيق ما يفيدني

حذفت مجموعة برامج تعديل صور و اكتفيت باثنين فقط لأنه كل واحد فيهم عنده خصائص ماهي في الثاني

حذفت الألعاب كلها و اكتفيت بوجودها في الآيباد

و حذفت تطبيقات التسوق زي نمشي و أُناس و جولي شيك …إلخ لأنه عملية الشراء منهم سهلة جدًا لدرجة صرت أشتري أشياء أبغاها بس ما أحتاجها وهذا مؤشر على بداية إدمان سيئة

بعدها روحوا للصور و احذفوا كل الصور اللي وصلتكم من الواتس الآب أو تطبيق ثاتي، الصور المكررة، صورك اللي مو عاجبتك و شكلك فيها مو حلو بس مخليتها من باب الذكريات! صور الهدايا و الكروت اللي هي أساسًا عندك في بوكس في غرفتك.. صور سويتِ لها سكرين شوت عشان يوم بتخيطين نفس الفستان أو بتحطين نفس العبارة في سنابك ..

بعد كذا روحوا لإيميلاتكم و امسحوا كل الإيميلات المثبته اللي ماعاد صارت مهمه و شيلوا النجمة عن الإيميلات اللي كانت ضرورية ..

تخلصوا من كل الإشتراكات اللي ما عاد تنفعكم و رسايلهم صارت مزعجة لكم..

روحوا لصندوق الوارد من آخر صفحة و ابدأوا امسحوا ..صدقوني ما بيبقى لكم من ٢٠٠٠ إيميل إلا يمكن ٥ مهمه

بعدها سطح المكتب و الملفات اللي على الكمبيوتر والهارد دسك

جددوا الملف اللي فيه كل أوراقكم و شهاداتكم و سيرتكم الذاتية، ضيفوا الأشياء الجديدة و احذفوا اللي صارت مو مهمه

هذي الخطوات كلها بتعطينا مساحة في أجهزتنا عشان نحط فيها الأشياء المهمة بدون ما نتورط يوم و إحنا في عجلة من أمرنا و نحذف شيء مهم عندنا بس عشان نلقى شوية مساحة..

minimalism

الحلقة الجاية من سلسلة How to be a Minimalist حنتكلم فيها عن:

  • فوائد الإعتدال 

  • تأثيره النفسي و الجسدي علينا 

  • أشياء يجب علينا التخلص منها فورًا

  • فين نودي الأغراض اللي نتخلص منها وما زالت في حالة جيدة أو حتى جديدة؟

💙💙شكرًا صِبـا و جمان على التصميم الجميل

sağlıcakla kalin